رائع عزيزي ... واختيار موفق


بالنسبة للصراحة فبالتأكيد ما في مثلها ,,


لكن مجتمعك واللي حولك يرغمونك على اخفاء الصراحة واستخدام الحيل والكذب البيضاء "او كما تسمى" .


مثلاً بعض الاشخاص ممكن يقول لو كنت صريح بيتسبب لي مشاكل وعوائق كثيرة في حياتي .


مثل ما ذكرت اخي الكريم سالفة الشاب اللي طلع مع اخوياه للثمامة . فلو فرضنا قال لأمه او ابوه انه بيروح الثمامة فاتوقع

اقرب رد : ليش ياوليد تروح ؟ غبار وزحمة وفيها ناس مهبل ووووو و هلم جرى من هذه التهويلات والولولات .


فمن باب أولى الشاب يبي يفتك من هالموضوع كله . فبيظطر يستخدم "مخارج" للفرار من هذه العوائق .


وهي بالتأكيد له مضارها مثل مالها من منافع .


على طاريها ... انا مرة واحد من اعز اصدقائي رغم اني اقدره واعزه الا انه يوجد بيني وبينه عوائق كثيرة واهمها "الصراحة"


يعني مايصارحك بأشياء كثيرة .


مثلاً يوم من الأيام كنت بالشرقية واكلم عليه وهو بالرياض وسوالف انا وياه وقالي تصدق اليوم رايح لبيتكم وادورك احسبك موجود,
واشوف موترك ملبق عند باب البيت وانا اللي ادور حول بيتكم ابيك تطلع , قلت ليه مادقيت ؟ قال مامعي جوال كنت حاطه عند المصلح ,
قلت زين . وانا بالأساس موتري موقفه عند بيت واحد من اخوياي اللي رايح معه الشرقية . وطبعا فهمت المقصود من كلامه "يعني اني مهتم فيك ومن هالكلام"
لكن حقيقة ضيق صدري انه كذب ولو انطلت علي اكيد بتمشي علي اشياء كثيرة ثانية , لكني لمحت له في موقف آخر ولعله فهم المقصد .


وأيضاً موقف آخر مع نفس الشخص , مرة كنت بالجامعة ومتواعد انا وياه نتقابل عاد دقيت عليه عقب الجامعه تقريبا نصف العصر ,
والرجال ما رد , دقيت ثانية ونفس الحكاية ما رد , انا استغربت مو عادته , عاد جا من بكرة دق علي استغفر الله دقيت عليه انا ,
واستفسرت ليه ما رد امس رغم انه هو مواعدني , قال معليش كنت نايم وقبل لا انوم حاطه على الصامت !
وانا اعرف اكثر من شخص كلمه بالجوال ذاك اليوم !! وحقيقة ضاق صدري لكن مع الايام سبحان الله تعودت على "عدم صراحته"
ومثل ماتقول غموضه في بعض المواقف رغم ان لها آثار سلبية الا اني متحملها ومثل ماقال "انظر للجانب الممتلئ من الكاس"
وحقيقة قلبه طيب بالحيل وهذي تمحي كل ما سبق والله يهديه .


وشكرا لك عزيزي على الموضوع المهم حقيقة .


واعذرني على الاطالة