| انا ماختبرت قياس لاني مختبر كفايات السنه الماضية بس لو انت متابع منتدى الخريجين بموقع الوزارة فأذكر قبل الإختبار والتسجيل جا واحد بالمنتدى من الوزارة وقال ان الاختبار بيكون فيه رسوب وان اللي بيرسب ماراح ترفع اوراقة ..
طبعا هذا بمنتدى الخريجين للموقع الرسمي للوزارة .. تدري وين المشكلة ان الوزارة حرصت على ذكر ال 200 ريال في موقعها اكثر من التذكير بان هناك رسوب ونجاح وهذا ما اتحدى اي مسئول بالوزارة ان يثبت ان هناك بيان رسمي نزل على الموقع يشير الى ذلك .. لهذا كل المتخرجين دخلو الاختبار على ان مافيه رسوب ونجاح ..
طالما لم يذكرو ان الاختبار فيه نجاح ورسوب بالموقع فكان من الأجدر ان لايعتمد عليها في عملية التصفيات المؤهله للتدريس ..
يابو عابد انا جلست مع طلاب معدلاتهم والله فوق الاربع ونص عارف هذولي بالكلية وش كانو يسوون .. ماكانو يسهرون ولايطلعون من البيت للمسجد ومن المسجد للبيت والحين يجيبولهم اختبار لو اللي وضع الاسئلة اختبر فيه مانجح ..
بالنسبة لك وكنصيحه من اخ خبير قدم على موقع الوزارة مع انهم يقولون اللي مانجح لايقدم .. وانا قابلت واحد عند بوابة مبنى ادارة التعليم بجده مادري هو صادق ولا كان سكران ولاهو داري وش يقول ..تعين وهو ماختبر كفايات
بغيت ادخل على مدير التعليم واصفقه لين اعمية يعني الحين انا ياللي اختبرت وعديت جالس وهذا اللي ماختبر تعين .. وبعدين هذيك تعطيك تساؤل كيف تعين
تعال للوظائف المعلنه 2250 وش بتسوي فيها والخريجين ضعف هالعدد عشرين مره وخذ تخصصي لغة عربية جامعي عددنا على حسب احصائية السنة الماضية 5500 قل بنوصل ل6000 خريج هالسنه .. اذا الاحتياج لنا ماراح يتجاوز ال 360 بأي شكل من الأشكال وش بتقول ...
للمعلومية اذا تبي تقدم على الامارات ترا التسجيل مفتوح وانا قدمت وش يجلسني هنا ماغير نت وسادح باطح ومقابل شوتايم واي ارتي حتى المدارس الأهلية اللي انواع واشكال الإهانه يطردونك ولايفكرون فيك وفوقها واسطات واذا ماعندك واسطة لاتحلم ولاتفكر تقدم عليهم ..
للإمانه قرار استبعادكم كان ظالم لان الإعلان عن أن هناك رسوب ونجاح لم يعلن عنه عبر موقع الوزارة الرسمي ولا اي جهه عدا المنتدى الذي لايراه سوى بعض الخريجين لانه القسم الخاص بالخريجين مخفي ولايراه سوى الخريجين فقط ..
بالنسبة لدرجة 49 هذي بلحالها تقهر وانا واعرف واحد نفس وضعك جايب 49 يقول ليتها جات 30 ولا 49 على الأقل اريح عليها لكن 49 ذي تلوع الكبد
الله يعينك ياخوك وعندي فضفضه كثيره بس ماقول الا حسبي الله ونعم الوكيل تعبنا وتعبنا في الجامعة ودراسة ومصاريف وسهر وصداع وكتب نقابلها لين عمينا وصرنا مانشوف الا بنظارات وآخرتها عاطل وسادح جنبي شهادتي اللي يوم اشوف التاريخ فيها 1426 احس ان ودي اقطعها .. طبعا انا خريج 1425 .. وش فائدتها الحين شهادتي
حتى آلية التعيين مارحمتنا .. كل سنه يجون اهل المعدلات ابو اربع ونص ومن فوقنا يتعدونا بنقاطهم ويتعينون واحنا مكانك سر ..
عموما اسمحلي فضفضت في موضوعك لاني حاس بمعاناتك وعارف وش اللي انت فيه وماقول غير دعواتي لك بالتوفيق والله يكتبلك الخير ونراك في المكان الذي تتمناه قريبا ..  | 