فارس : بحول الواحد الاحد.. انتم بس قطعوا السلطة وافرشوا لنا زوليّه بالحوش
ام فارس : أغديك مايحتاج بس 
.. وش رايك اسوّي لكم جريش واكثّر لكم الكشنه فوقه
فارس : لا لا خلاص انا نويت أشوي 
وبعد الظهر مر فارس على دواجن الاخوين
واخذ له كرتون دجاج ابو سته ريال مجمد
وراح للبيت وحط الدجاج في قدر ماء حار كبير علشان يذوب 
وبعد ساعتين رجع فارس للمطبخ
وقعد يدوّر السكين
فارس : وفاااااااء.. وفاااااااااااااااااااء 
وفاء : هاه هاه هذاي.. وش بك تصارخ 
فارس : وين السكين الكبيره 
وفاء : تلقاه عندك بالدرج الوسطاني 
فارس : تعالي عطيني ايّاه.. ايديني رابصه بالدجاج
وفاء : اووووووووف 
فارس : خير انشاءالله .... وراتس تزمرين وعابطة(ن) خشتس
وفاء : مابي شي... دوك السكين 
وبعد ان أتم فارس عملية تقطيع الدجاج الى ارباع صغيرة
بدأ بالمطرسة والحواق لتتبيل الدجيجات بالليمون والبزار والملح والثوم والفلفل
ثم احضر قدرا كبيرا وبدأ بتجديع الدجيجات فوق بعضها البعض في مشهد ( واعيباه ) 
وذهب ليغط غطّة بسيطة استعدادا لمساء حافل
وبعد المغرب ... اقتلع فارس ذلك القدر من جذوره وانطلق هو وزوجته وبزارينه لبيت اهله 
واول مادخل... بدأت حفلة الهياط
فارس : يمااااااااااااااااااااااااااااااااااااااه 
ام فارس : هلا هلا.... وش بك تلجلج 
فارس : وين الزوليّه... وراهن الشغالات بنات الكلب مافرشن البساط
ام فارس : هذاهن يفرشنّه...اذكر الله انت بس 
وبعد فرش الزوليّة... احضر فارس المنقل وخيشة الفحم
ثم صاح مزمجرا : وين راحت علبة ( الابيض ) اللي كانت بخيشة الفحم
اخته حصّه : عقبك آخر مره يوم تشوي العام 
فارس : اقول هش بس.. بلا دجل.. انا حطيته بالخيشه
اخته حصه : ما احد لمس الخيشه عقبك 
فارس : خلاص خلاص.. عاد حصه والعناد والمتانح.. وين حمّودي يقطع لي كرتون
وبدأ فارس يشب الفحم ويهف على المنقل بقطعة الكرتون
ثم ذهب الى المطبخ واحضر علبة قشطة التاج فاضية وكوّم الفحم وحطها فوقه
ولمّا جمّر المنقل
فارس : وين الشبك الكبير يامنيره
حصه : عقبك
فارس : انا قلت يامنيره .. ماقلت حصه... يالقفتس
منيره : خابرته مرفوع فوق الثلاجه
فارس : لا ياشيخه ... صحيح ... الف الف مبروك.. يا حظتس والله
منيره : 
فارس : قومي انهجي هاتيه.. والا تحترينن اقوم انا
ثم هرعت منيره لتحضر الشبك وهي ترتعد من شدة الهلع
وبدأ فارسنا المغوار بالشواء
وفاحت ريحة الشواء بالحارة
وشمّها جارهم الشايب ابو سليمان ( النظول ) 
وعطاهم وحده بالثمنيات :
وش هالثعوره.. وش هالروايح..
نعن ابوكم حتى اللي مدفون بمقبرة العود لو شمها طلع يشاهق من تحت التراب
وماتعوق ابد ابد
فارس : آآآآآآآآآآآآآآآآآآآآآآآآآآآآآآي
امه وخواته وزوجته : خييييييييير وش جااااااااااااااااك
فارس : رفعت الشبك واثر فيه جمره متعلقه وطاحت على حجري
وفاء : على حجرك .. عسى ( ذاك وذاك ) ماجاه شي
حصه : هذا اللي هامّتس يالماصله
ام فارس : استحوا على وجيهكن وقومن جيبن جيك ماء بسرعة
فارس : آآآآآآآآآآآآآآآآآآآآآآآآآآآآآآآآآآآآآي
وهرع فارس مسرعا وهو يتلوّى من شدّة الالم
ووالدته المسكينة تجري وراءه وهي مذعورة
والبنات فاطسات ضحك وجميعهن بصوت واحد : ســادّه 
وفاء : 
وبعد ان استبدل ملابسه عاد ليكمل الشواء
وبعد ان انتهى صرخ كالعادة
فارس : وين الحافظة والخبز
وبعد حوالي نصف ساعة... وصلت الحافظة والخبز بحفظ الله ورعايته
وقامت الشغالات بفرش السفرة وتوزيع اطباق الحمص والمتبل والسلطة
ثم جاء فارس حاملا حافظة الدجاج المشوي
واجتمع الجميع على مائدة واحد يسودها الحب والوئام 
<< امحق
فارس : هاه وش رايكم... معلّم والا لا
ام فارس : يهبّل ياوليدي مامثله ابد.. الله مير يسلمك
حصه : زين بس وراه ينقّط دم.. كنّه ما استوى
منيره : انا اللي معي محرقه
نوره : وراك مكثر الفلفل... اشتب لساني 
وفاء : مره ثانيه نخلي رجالكن يشوون ونذوق شغل طيور البر
فارس : الشرهة مهيب عليكم... على اللي يشوي لكم.. انتم حدّكم خبز وجبن ويخب
.
.
.
.
.
احصائية وحصر شامل لجميع الخسائر العينية والمعنوية :
مادّيا
كرتون دجاج بمبلغ ( 60 ) ريال
بيبسي وسفن بمبلغ ( 10 ) ريال
حمص ومتبل من ابوزكي بمبلغ ( 36 ) ريال
علبة كبيرة كاتشب العلالي اضغط وتمتع بمبلغ ( 12 ) ريال
خيشة فحم صومالي بمبلغ ( 25 ) ريال
ديزل ابيض مكعبات بمبلغ ( 7 ) ريال
كيلو بصل ابيض كبير بارد لزوم السلطه بمبلغ ( 5 ) ريال
خبز حار ابيض بمبلغ ( 3 ) ريال
خبز بر اسمر بمبلغ ( 2 ) ريال
المجموع : 160 ريال
معنويا
ربكة شديدة وارجاف للجميع
احتراق الاعصاب وارتفاع ضغط الدم للجميع
حوسه وقروشه من العصر الى الساعة 2 بالليل
ريحة الديزل والشوي تعجعج بالبيت وبالحاره كلها
فتح المجال لابوسليمان النظول علشان ( يلعب لعبته ) ويصير نجم الأمسية
معاناة التنظيف بعد الشوي وكب الجمر اللي بالمنقل
ملاحظة بسيطة : بـ 160 ريال تروح لمطعم الطازج وتجيب أطلق فرّوج مشوي لكم كلّكم مع أطلق بسبوسة وتبلع العافيه 